ຄະນະໂຄສະນາອົບຮົມແຂວງສະຫວັນນະເຂດ, ເປີດຊຸດຮຽນສະໜັບສະໜູນໃຫ້ມະຫາຊົນກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກ ປະຈຳປີ 2026
ໃນຕອນເຊົ້າຂອງວັນທີ 26 ສິງຫາ 2026 ນີ້, ທີ່ຫ້ອງປະຊຸມຄະນະໂຄສະນາອົບຮົມແຂວງສະຫວັນນະເຂດ ໄດ້ຈັດພິທີເປີດຊຸດຮຽນສະໜັບສະໜູນໃຫ້ມະຫາຊົນກ້າວໜ້າ ເພື່ອກະກຽມຂະຫຍາຍເຂົ້າເປັນສະມາຊິກພັກຢ່າງເປັນທາງການ ໂດຍການໃຫ້ກຽດເປັນປະທານ ແລະ ເຜີຍແຜ່ເອກະສານຂອງ ທ່ານ ພູເງິນ ສີວົງກອນ, ຄະນະພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງສະຫວັນນະເຂດ; ມີບັນດາຕາງໜ້າຈາກພາກສ່ວນທີ່ກ່ຽວຂ້ອງ ພ້ອມດ້ວຍມະຫາຊົນກ້າວໜ້າເຂົ້າຮ່ວມຢ່າງພ້ອມພຽງ.
ການຈັດຊຸດຮຽນສະໜັບສະໜູນໃນຄັ້ງນີ້ ກໍເພື່ອຍົກລະດັບຄວາມຮູ້ ຄວາມສາມາດທາງດ້ານການເມືອງ-ແນວຄິດ ໃຫ້ແກ່ມະຫາຊົນຜູ້ທີ່ມີຄວາມກ້າວໜ້າ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບມູນເຊື້ອອັນສະຫງ່າລາສີ, ລະບຽບກົດໝາຍ, ລະບົບການຈັດຕັ້ງ ພ້ອມທັງມາດຖານເງື່ອນໄຂຕ່າງໆ ໃນການກ້າວຂຶ້ນຜັນຂະຫຍາຍເປັນສະມາຊິກພັກປະຊາຊົນ ປະຕິວັດລາວ ທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ການຈັດຕັ້ງມອບໝາຍໃຫ້.
ໃນພິທີດັ່ງກ່າວ, ທ່ານ ພູເງິນ ສີວົງກອນ ໄດ້ນຳເອົາເນື້ອໃນເອກະສານອັນສຳຄັນມາເຜີຍແຜ່ ເຊິ່ງເນັ້ນໜັກໃສ່ການອະທິບາຍກ່ຽວກັບບົດບາດຂອງພັກການເມືອງ ແລະ ລະບອບປະຊາທິປະໄຕ ປະຊາຊົນ ທີ່ພັກເຮົາເປັນແກນນຳ ເຊິ່ງເປັນອົງການການເມືອງສູງສຸດຂອງຊັ້ນຄົນກຳມະກອນ ແລະ ຊາວຜູ້ອອກແຮງງານ. ພ້ອມດຽວກັນນັ້ນ, ທ່ານຍັງໄດ້ຕີລາຄາຄືນເຖິງມູນເຊື້ອປະຫວັດສາດແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນ ປະຕິວັດລາວ ນັບຕັ້ງແຕ່ມື້ສ້າງຕັ້ງໃນວັນທີ 22 ມີນາ 1955 ພາຍໃຕ້ການນຳພາຂອງ ປະທານ ໄກສອນ ພົມວິຫານ ພ້ອມດ້ວຍໝູ່ຄະນະ ໂດຍຜ່ານຂະບວນການຕໍ່ສູ້ກູ້ຊາດອັນຍືດເຍື້ອ ແລະ ເຕັມໄປດ້ວຍຄວາມເສຍສະຫຼະ.
ນອກຈາກນີ້, ຜູ້ເຂົ້າຮ່ວມຍັງໄດ້ຮັບຟັງການເຊື່ອມຊຶມກ່ຽວກັບລະບົບການຈັດຕັ້ງຂອງພັກ ທີ່ຈັດຕັ້ງປະຕິບັດຕາມຫຼັກການລວມສູນປະຊາທິປະໄຕ ເຊິ່ງກວມເອົາ 4 ຂັ້ນ ຄື: ຂັ້ນສູນກາງ, ຂັ້ນແຂວງ-ນະຄອນຫຼວງ, ຂັ້ນເມືອງ-ນະຄອນ ແລະ ຂັ້ນຮາກຖານພັກ, ພ້ອມທັງທຳຄວາມເຂົ້າໃຈກ່ຽວກັບອຸດົມການສັງຄົມນິຍົມ ທີ່ພັກເຮົາມຸ່ງໝັ້ນນຳພາປະຊາຊາດກໍ່ສ້າງປະເທດຊາດໃຫ້ມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.
ຕອນທ້າຍຂອງການເຜີຍແຜ່ເອກະສານ, ປະທານ ໄດ້ເນັ້ນໜັກເຖິງມາດຖານອັນເຂັ້ມງວດຂອງສະມາຊິກພັກ ແລະ ເງື່ອນໄຂຂອງມະຫາຊົນທີ່ຈະຖືກພິຈາລະນາຮັບຮອງເຂົ້າໃນແຖວໜ້າຂອງພັກ ໂດຍຮຽກຮ້ອງໃຫ້ມະຫາຊົນກ້າວໜ້າທຸກສະຫາຍ ຕ້ອງເປັນແບບຢ່າງນຳໜ້າໃນການປະຕິບັດໜ້າທີ່ວຽກງານ, ເປັນຜູ້ທີ່ມີມູນເຊື້ອເສຍສະຫຼະເພື່ອສ່ວນລວມ, ມີຄວາມຈົງຮັກພັກດີຕໍ່ອຸດົມການຂອງພັກ, ມີຄຸນສົມບັດສິນທຳປະຕິວັດທີ່ໃສສະອາດ ແລະ ໄດ້ຮັບຄວາມເຊື່ອໝັ້ນໄວ້ວາງໃຈຈາກການຈັດຕັ້ງມະຫາຊົນ.
ຊຸດຮຽນສະໜັບສະໜູນດັ່ງກ່າວ ໄດ້ດຳເນີນໄປດ້ວຍບັນຍາກາດອັນຟົດຟື້ນ ແລະ ເຕັມໄປດ້ວຍເນື້ອໃນຄວາມໝາຍເລິກເຊິ່ງ, ເຊິ່ງເປັນການຕື່ມກຳລັງໃຈ ແລະ ຍົກລະດັບຄວາມຮູ້ຄວາມສາມາດໃຫ້ແກ່ມະຫາຊົນກ້າວໜ້າ ພ້ອມທັງເປັນການກະກຽມຄວາມພ້ອມທາງດ້ານສະຕິປັນຍາ ແລະ ການເມືອງ-ແນວຄິດ ໃຫ້ແກ່ການເລືອກເຟັ້ນສະມາຊິກພັກຮຸ່ນໃໝ່ທີ່ມີຄຸນນະພາບເຂົ້າໃນການຈັດຕັ້ງພັກໃນຕໍ່ໜ້າ.
