ແຂວງສະຫວັນນະເຂດ, ສຳເລັດກອງປະຊຸມຄັ້ງປະຖົມມະລຶກ ສະພາປະຊາຊົນແຂວງ ຊຸດທີ V

  ໃນຕອນບ່າຍຂອງວັນທີ 24 ເມສາ 2026 ນີ້ຢູ່ທີ່ຫໍວັດທະນະທຳໄກສອນພົມວິຫານ ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ ຊຸດທີ V ແມ່ນໄດ້ສຳເລັດລົງດ້ວຍໝາກຜົນອັນຈົບງາມ ໂດຍການເປັນກຽດເຂົ້າຮ່ວມຂອງທ່ານ ປະລິນຍາເອກ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 , ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 , ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 , ສະມາຊິກສະພາປະຊາຊົນແຂວງ, ແຂກຖຶກເຊີນເຂົ້າຮ່ວມ.

ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ໄດ້ກ່າວປິດກອງປະຊຸມຢ່າງເປັນທາງການວ່າ: ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງສະຫວັນນະເຂດ ຊຸດທີ V ໄດ້ຈັດຂຶ້ນຢ່າງເປັນທາງການ ໃນບັນຍາກາດທີ່ທົ່ວພັກ, ທົ່ວກອງທັບ, ທົ່ວປວງຊົນພາຍໃນແຂວງ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງຄະນະບໍລິຫານງານພັກແຂວງ ເຂົ້າໃນ ທຸກຂົງເຂດວຽກງານ ແລະ ມີຄວາມເບີກບານມ່ວນຊື່ນ ຕໍ່ຜົນສໍາເລັດຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນແຂວງ ຊຸດທີ V ທີ່ຈັດຂຶ້ນໃນວັນທີ 22 ກຸມພາ ຜ່ານມາ.

  ໃນໂອກາດທີ່ມີຄວາມໝາຍສໍາຄັນນີ້, ກອງປະຊຸມສະແດງຄວາມປິຕິຊົມຊື່ນ ແລະ ຊົມເຊີຍ ຕໍ່ບັນດາທ່ານທີ່ໄດ້ຮັບຄວາມໄວ້ວາງໃຈ, ໄດ້ຮັບຄວາມເຊື່ອໝັ້ນຈາກປະຊາຊົນຜູ້ມີສິດເລືອກຕັ້ງ ທົ່ວແຂວງສະຫວັນນະເຂດ ທີ່ໄດ້ເລືອກເອົາບັນດາທ່ານເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ຊຸດທີ X, ສະມາຊິກສະພາປະຊາຊົນແຂວງ ຊຸດທີ V ເຊິ່ງໄດ້ ເຂົ້າຮ່ວມກອງປະຊຸມຄັ້ງນີ້ຢ່າງພ້ອມພຽງກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງ ຊຸດທີ V ໃນຄັ້ງນີ້ຈະໄດ້ສຸມໃສ່ພິຈາລະນາ ແລະ ຕົກລົງບັນຫາສໍາຄັນພື້ນຖານຂອງແຂວງ ດັ່ງນີ້:

1. ຮັບຟັງການລາຍງານ ຂອງຄະນະກຳມະການເລືອກຕັ້ງຂັ້ນແຂວງ ກ່ຽວກັບ ຜົນການເລືອກຕັ້ງ ແລະ ການຢັ້ງຢືນຄຸນລັກສະນະຂອງສະມາຊິກສະພາປະຊາຊົນແຂວງ;

2. ເລືອກຕັ້ງ ປະທານສະພາປະຊາຊົນແຂວງ ຕາມການສະເໜີຂອງຄະນະປະຈຳສະພາປະຊາຊົນແຂວງ ຊຸດທີ IV;

3. ເລືອກຕັ້ງ ຮອງປະທານສະພາປະຊາຊົນແຂວງ ແລະ ກຳມະການຄະນະປະຈຳສະພາປະຊາຊົນແຂວງ ຕາມການສະເໜີຂອງປະທານສະພາປະຊາຊົນແຂວງ ຊຸດທີ V;

4. ພິຈາລະນາ, ຮັບຮອງເອົາໂຄງປະກອບກົງຈັກ ຂອງສະພາປະຊາຊົນແຂວງ ຊຸດທີ V, ການແຕ່ງຕັ້ງປະທານຄະນະກຳມະການ ແລະ ຫົວໜ້າຫ້ອງວ່າການສະພາປະຊາຊົນແຂວງ ຕາມການສະເໜີຂອງຄະນະປະຈຳສະພາປະຊາຊົນແຂວງ ຊຸດທີ V;

5. ພິຈາລະນາ, ຮັບຮອງການສະເໜີຍົກຍ້າຍບຸກລະຄາກອນ ຂອງຄະນະກຳມະການປົກຄອງແຂວງ;

6. ພິຈາລະນາ, ຮັບຮອງເອົາ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ແຫ່ງລັດຂອງແຂວງ 5 ປີ ຄັ້ງທີ X (2026-2030) ຂອງຄະນະກຳມະການປົກຄອງແຂວງ;

7. ພິຈາລະນາ, ຮັບຮອງເອົາ ແຜນການ 5 ປີ (2026-2030) ຂອງອົງການກວດກາລັດແຂວງ;

8. ພິຈາລະນາ, ຮັບຮອງເອົາ ແຜນການ 5 ປີ (2026-2030) ຂອງອົງການກວດສອບປະຈຳພາກກາງ 2

9. ພິຈາລະນາ, ຮັບຮອງເອົາ ແຜນການ 5 ປີ (2026-2030) ຂອງອົງການໄອຍະການປະຊາຊົນແຂວງ;

10. ພິຈາລະນາ, ຮັບຮອງເອົາ ແຜນການ 5 ປີ (2026-2030) ຂອງສານປະຊາຊົນແຂວງ;

11. ພິຈາລະນາ, ຮັບຮອງເອົາ ແຜນການເຄື່ອນໄຫວວຽກງານ 5 ປີ (2026-2030) ຂອງສະພາປະຊາຊົນແຂວງ ຊຸດທີ V.

12. ພິຈາລະນາ, ຮັບຮອງເອົາ ແຜນການສ້າງ ແລະ ປັບປຸງນິຕິກຳໃຕ້ກົດໝາຍ (2026-2030) ຂອງຄະນະກຳມະການປົກຄອງແຂວງ;