ຄະນະໂຄສະນາອົບຮົມແຂວງສະຫວັນນະເຂດ, ຈັດພິທີປາຖະກະຖາ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 71 ປີ ແລະ ວັນນັກຮົບເສຍອົງຄະ-ເສຍສະຫຼະຊີວິດເພື່ອປະເທດຊາດ ຄົບຮອບ 80 ປີ.
ວັນທີ 20 ມີນາ 2026 ໃນບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນລາວ ພວມຕັ້ງໜ້າສ້າງຜົນງານຂໍ່ານັບຮັບຕ້ອນວັນປະຫວັດສາດຂອງຊາດ; ຄະນະໂຄສະນາອົບຮົມແຂວງສະຫວັນນະເຂດ ໄດ້ຈັດພິທີປາຖະກະຖາລະນຶກ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 71 ປີ ແລະ ວັນນັກຮົບເສຍອົງຄະ-ເສຍສະຫຼະຊີວິດເພື່ອປະເທດຊາດ ຄົບຮອບ 80 ປີ ຂຶ້ນຢ່າງສົມກຽດ ຢູ່ທີ່ສະໂມສອນຫ້ອງວ່າການແຂວງ.
ໃຫ້ກຽດເປັນປະທານ ແລະ ຂຶ້ນປາຖະກະຖາໃນຄັ້ງນີ້ມີ ທ່ານ ສົມໃຈ ສີສົມພອນ ແລະ ທ່ານ ມົງກຸດເພັດ ວົງພະຈັນ ຮອງຫົວໜ້າຄະນະໂຄສະນາອົບຮົມແຂວງ, ໂດຍມີຄະນະພັກຮາກຖານ, ຫົວໜ້າພະແນກການ, ກຳລັງປ້ອງກັນຊາດ-ປ້ອງກັນຄວາມສະຫງົບ, ອົງການຈັດຕັ້ງມະຫາຊົນ ພ້ອມດ້ວຍພະນັກງານ ແລະ ສະມາຊິກພັກອ້ອມຂ້າງແຂວງເຂົ້າຮ່ວມຢ່າງພ້ອມເພຍ.
ໃນພິທີ, ທ່ານ ມົງກຸດເພັດ ວົງພະຈັນ ໄດ້ຫວນຄືນມູນເຊື້ອແຫ່ງຄວາມພິລະອາດຫານຂອງບັ້ນຮົບປ້ອງກັນຕົວເມືອງທ່າແຂກ (21/3/1946 – 21/3/2026). ທ່ານໄດ້ເນັ້ນໜັກວ່າ ວັນທີ 21 ມີນາ ແມ່ນວັນແຫ່ງຄວາມຄຽດແຄ້ນຕໍ່ພວກລ່າເມືອງຂຶ້ນຝຣັ່ງ ທີ່ໄດ້ສ້າງໂສກນາດຕະກຳອັນເຈັບແສບຕໍ່ປະຊາຊົນລາວ. ແຕ່ໃນຂະນະດຽວກັນ, ມັນກໍແມ່ນວັນແຫ່ງຄວາມສາມັກຄີສູ້ຮົບແບບຮ່ວມສຳພັນສູ້ຮົບ ລາວ-ຫວຽດນາມ ທີ່ບໍ່ຍອມຈຳນົນ.
ວິລະກຳໃນຄັ້ງນັ້ນ ໄດ້ຈາລຶກຊື່ຂອງ ປະທານ ສຸພານຸວົງ ໃນຖານະຜູ້ນຳພາ ແລະ ຜູ້ບັນຊາການທະຫານທີ່ເດັດດ່ຽວໜຽວແໜ້ນ, ຜູ້ທີ່ຍອມເສຍສະຫຼະເລືອດເນື້ອເພື່ອເອກະລາດຂອງຊາດ. ບັ້ນຮົບທ່າແຂກໄດ້ກາຍເປັນໄຟປະຕິວັດທີ່ປຸກລະດົມນ້ຳໃຈຮັກຊາດຂອງຄົນລາວທັງຊາດ ໃຫ້ລຸກຂຶ້ນຕໍ່ສູ້ຢ່າງບໍ່ຢຸດຢັ້ງ ຈົນສາມາດຍາດໄດ້ໄຊຊະນະໃນທີ່ສຸດ.
ຈາກນັ້ນ ທ່ານ ສົມໃຈ ສີສົມພອນ ໄດ້ຂຶ້ນປາຖະກະຖາຫວນຄືນມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ (22/3/1955 – 22/3/2026). ທ່ານໄດ້ຊີ້ໃຫ້ເຫັນເຖິງບົດບາດອັນສຳຄັນຍິ່ງຂອງພັກ ໃນຖານະເປັນຜູ້ນຳພາທຸກໄຊຊະນະຂອງການປະຕິວັດລາວ. ຕະຫຼອດ 71 ປີຜ່ານມາ, ພັກໄດ້ຢຶດໝັ້ນໃນລັດທິມາກ-ເລນິນ, ຜ່ານຜ່າທຸກອຸປະສັກຂັ້ນໄດປະຫວັດສາດ ເພື່ອນຳພາປວງຊົນລາວປົດປ່ອຍປະເທດຊາດ ແລະ ສ້າງສາພັດທະນາ ສປປ ລາວ ໃຫ້ກ້າວຂຶ້ນຢ່າງບໍ່ຢຸດຢັ້ງ.
ພິທີປາຖະກະຖາໃນຄັ້ງນີ້ ບໍ່ພຽງແຕ່ແມ່ນການລະນຶກເຖິງເຫດການໃນອະດີດ, ແຕ່ມັນແມ່ນການ “ສັກວັກຊິນ” ທາງດ້ານແນວຄິດ-ການເມືອງ ໃຫ້ແກ່ພະນັກງານ-ສະມາຊິກພັກ ໃຫ້ຢຶດໝັ້ນໃນອຸດົມການ, ສືບສານມູນເຊື້ອອັນດີງາມ ແລະ ເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ວຽກງານ ເພື່ອສືບຕໍ່ສ້າງສາພັດທະນາປະເທດຊາດໃຫ້ຮຸ່ງເຮືອງສີວິໄລ.
