ຄະນະໂຄສະນາແຂວງສະຫວັນນະເຂດ ປາຖະກະຖາ
ວັນຊາດທີ 2 ທັນວາ ແລະ ວັນເກີດປະທານ ໄກສອນ ພົມວິຫານ
ໃນຕອນເຊົ້າ, ວັນທີ 29 ພະຈິກນີ້ ຢູ່ທີ່ສະໂມສອນຫ້ອງວ່າການປົກຄອງແຂວງ ສະຫວັນນະເຂດ ໄດ້ຈັດພິທີປາຖະກະຖາ ວັນຊາດທີ 2 ທັນວາ ຄົບຮອບ 49 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ໂດຍການໃຫ້ກຽດປາຖະກະຖາຂອງທ່ານ ຄຳພູນ ຕຸໄພທູນ ອາດີດຮອງເຈົ້າແຂວງ ສະຫວັນນະເຂດ ເຂົ້າຮ່ວມຮັບຟັງມີບັນດາສະມາຊິກພັກ ພະນັກງານ ລັດຖະກອນ ,ພະແນກການອ້ອມຂ້າງແຂວງ, ກຳລັງປກຊ – ປກສ ເຂົ້າຮ່ວມ
ທ່ານ ຄຳພູນ ຕຸໄພທູນ ໄດ້ຫວນຄືນມູນເຊື້ອທີ 2 ທັນວາ ,ມູນເຊື້ອ ແລະ ຄວາມໝາຍຄວາມສຳຄັນຂອງວັນທີ 2 ທັນວາ 1975 ແມ່ນເປັນວັນທີ່ີມີຄວາມໝາຍສຳຄັນສຳລັບທົ່ວພັກ , ທົ່ວລັດ ແລະ ທົ່ວປວງຊົນລາວທັງຊາດ , ແມ່ນວັນແຫ່ງໄຊຊະນະອັນຍິ່ງໃຫ່ຍ ໃນປະຫວັດສາດແຫ່ງການຕໍ່ສູ້ຂອງຊາດລາວເຮົາ ແມ່ນວັນທີປະຊາຊົນລາວບັນດາເຜົ່າໄດ້ມີອິດສະຫລະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ , ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວສັນຕິພາບ,ເອກະລາດ, ປະຊາທິປະໄຕ ,ເອກະພາບ,ວັດທະນາຖາວອນ ປະທານໄກສອນ ພົມວິຫານ ໄດ້ຕີລາຄາວັນທີ 2 ທັນວາປີ 1975 ວ່າ: ບໍ່ທັນມີເວລາໃດທີ່ປະຊາຊົນເຮົາ ເຊິ່ງເປັນຜູ້ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະອັນສົມບູນ ຢ່າງສະຫງ່າລາສີຄືແນວນີ້ຈັກເທື່ອ , ໄຊຊະນະບໍ່ສະເພາະແຕ່ໄດ້ຟື້ນຟູຄວາມເປັນເອກະລາດຂອງປະເທດເຮົາ, ຫາກຍັງເປັນຄັ້ງທຳອິດ ທີ່ປະຊາຊົນບັນດາເຜົ່າຜູ້ເຄີຍດຳລົງຊີວິດເປັນທາດ ໄດ້ກາຍເປັນເຈົ້າຂອງແທ້ຈິງຂອງຊາດໜື່ງທີ່ມີເອກະລາດ , ອິດສະຫລະພາບຢ່າງສົມບູນ ແລະ ພວມກ້າວຂື້ນສູ່ສັງຄົມນິຍົມ, ເຮັດໃຫ້ຄວາມມຸ້ງຫວັງອັນແຮງກ້າຂອງປວງຊົນລາວກໍຄື ຂອງມວນມະນຸດປະກົດຜົນເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ, ພ້ອມນີ້ຍັງໄດ້ຫວນຄືນ ວັນເກີດປະທານ ໄກສອນ ພົມວິຫານ ຄົບນອບ 104 ປີຕື່ມອີກ
